:::: نهايتنا :::::::

لا تحسبيني بأنثر الدمع وانهار...والا اترجى واطلبك ما تروحين

روحي عسى دربك بساتين وازهار...وروحي وغيري بالمخاليق تلقين

صحيح لك بالقلب حشمه ومقدار...لكن شسوي لك اذا ما تحسين

لي قلب لامنه عشق حيل مدرار....ومن الغلا عندي يكفي ملايين

بس ان لقى صد وجفى صار جبار...واقدر افارق واهجرك لا تخافين

يا بنت انا لي عزتي وبأخذ الثار...وابغى انصحك لا رحت اصحي تنادين

ماني براجع لا تقولين وش صار؟...لا تسأليني ليه؟انتي تعرفين

غيرك تمنوني وبالعب وبأختار...واعشق بدالك الف وحده بيومين

وانتي رصيدك بالغلا عندي اصفار....ماهو بذنبي ما عرفتي تحبين

وكل الذي لأجلك كتبته من اشعار.....والله خساره فيك ما تستحقين

حتى صورك الي من العام تذكار....بأدوسها وانتي قبالي تشوفين

يا ما عطيتك الف انذار..وانذار.....اقدر افارق...قلت لك:لا تحدين

واليوم انا ليه اتعب النفس واحتار....دامك جرحتيني وكنتي تسلين

ان كنت صاحي ومن طويلين الأعمار.... لجرح بدال الجرح تسعه وتسعين

والحين يالله خلي دموعك امطار...وبأحاول اضحك طول ما انتي تصيحين